Mëranaw Guro Alim Saromantang
Surah An-Naba' ( The Great News ) - Aya count 40
عَمَّ يَتَسَاءَلُونَ
( 1 ) 
Antonaa so gi iran pamagizai yan?
عَنِ النَّبَإِ الْعَظِيمِ
( 2 ) A tothol a mala,
الَّذِي هُمْ فِيهِ مُخْتَلِفُونَ
( 3 ) A so siran na di siran on phagayonayon?
كَلَّا سَيَعْلَمُونَ
( 4 ) Na gnki ran, ka khatokawan iran bo!
ثُمَّ كَلَّا سَيَعْلَمُونَ
( 5 ) Oriyan iyan, na sabnar a katokawan iran bo!
أَلَمْ نَجْعَلِ الْأَرْضَ مِهَادًا
( 6 ) Ba Ami da baloya so lopa a miyadmpas?
وَالْجِبَالَ أَوْتَادًا
( 7 ) Go so manga palaw a manga pask?
وَخَلَقْنَاكُمْ أَزْوَاجًا
( 8 ) Go inadn Ami skano a nggaganapa,
وَجَعَلْنَا نَوْمَكُمْ سُبَاتًا
( 9 ) Go biyaloy Ami so torog iyo a kadkha,
وَجَعَلْنَا اللَّيْلَ لِبَاسًا
( 10 ) Go biyaloy Ami so gagawii a nditarn,
وَجَعَلْنَا النَّهَارَ مَعَاشًا
( 11 ) Go biyaloy Ami so dawndaw a ipphaningkawyagn;.
وَبَنَيْنَا فَوْقَكُمْ سَبْعًا شِدَادًا
( 12 ) Go pimbalayan Ami so kaporoan iyo sa pito a manga babagr (a manga langit),
وَجَعَلْنَا سِرَاجًا وَهَّاجًا
( 13 ) Go miyadn Kami sa palitaan a masindaw (a alongan),
وَأَنزَلْنَا مِنَ الْمُعْصِرَاتِ مَاءً ثَجَّاجًا
( 14 ) Go piyakatoron Ami a phoon ko manga gabon so ig a madakl,
لِّنُخْرِجَ بِهِ حَبًّا وَنَبَاتًا
( 15 ) Ka an Ami mapakagmaw sa sabap rkaniyan so prpran ago mangngto,
وَجَنَّاتٍ أَلْفَافًا
( 16 ) A go manga pamomolan a milapilapis.
إِنَّ يَوْمَ الْفَصْلِ كَانَ مِيقَاتًا
( 17 ) Mataan! a so alongan a kokoman na miyabaloy a wakto a kapthatalabokan,
يَوْمَ يُنفَخُ فِي الصُّورِ فَتَأْتُونَ أَفْوَاجًا
( 18 ) Sii ko alongan a kaiyopa ko sanggakala, na makatalingoma kano a pizagorompong,
وَفُتِحَتِ السَّمَاءُ فَكَانَتْ أَبْوَابًا
( 19 ) Go kalkaan so langit na mabaloy a manga paytaw,
وَسُيِّرَتِ الْجِبَالُ فَكَانَتْ سَرَابًا
( 20 ) Go mikayontong so manga palaw na mabaloy a lopapk.
إِنَّ جَهَنَّمَ كَانَتْ مِرْصَادًا
( 21 ) Mataan! a so naraka Jahannam na aya btad iyan na mibbkn a ayan,
لِّلطَّاغِينَ مَآبًا
( 22 ) A khandodan o miyamangakowala,
لَّابِثِينَ فِيهَا أَحْقَابًا
( 23 ) Matatap siran on sa tanitiyasa;
لَّا يَذُوقُونَ فِيهَا بَرْدًا وَلَا شَرَابًا
( 24 ) Daa khataam iran on a pakadnggaw, go da a khaynom on,
إِلَّا حَمِيمًا وَغَسَّاقًا
( 25 ) A rowar ko phlikabo a ig go dana,
جَزَاءً وِفَاقًا
( 26 ) Balas a pindait (ko galbk iran a marata).
إِنَّهُمْ كَانُوا لَا يَرْجُونَ حِسَابًا
( 27 ) Mataan! a siran na aya btad iran na di iran ikhalk so itongan,
وَكَذَّبُوا بِآيَاتِنَا كِذَّابًا
( 28 ) Go piyakambokhag iran so manga ayat Ami sa tanto a kapakambokhag.
وَكُلَّ شَيْءٍ أَحْصَيْنَاهُ كِتَابًا
( 29 ) Na langowan taman na inisorat Ami skaniyan ko daptar;
فَذُوقُوا فَلَن نَّزِيدَكُمْ إِلَّا عَذَابًا
( 30 ) "Na taami niyo, ka da dn a ipagoman Ami rkano a rowar ko siksa."
إِنَّ لِلْمُتَّقِينَ مَفَازًا
( 31 ) Mataan! a adn a bagian o miyamananggila a darpa a kapakadaya,
حَدَائِقَ وَأَعْنَابًا
( 32 ) A manga pamomolan, ago manga anggor,
وَكَوَاعِبَ أَتْرَابًا
( 33 ) Go manga raga a mrzarza,
وَكَأْسًا دِهَاقًا
( 34 ) Go tagoay sa inomn a tthbira.
لَّا يَسْمَعُونَ فِيهَا لَغْوًا وَلَا كِذَّابًا
( 35 ) Daa khan´g iran on a ilang go da a kabokhag;
جَزَاءً مِّن رَّبِّكَ عَطَاءً حِسَابًا
( 36 ) Balas a phoon ko Kadnan ka, a pammgayan a tarotop, -
رَّبِّ السَّمَاوَاتِ وَالْأَرْضِ وَمَا بَيْنَهُمَا الرَّحْمَٰنِ ۖ لَا يَمْلِكُونَ مِنْهُ خِطَابًا
( 37 ) Kadnan o manga langit, ago so lopa, ago so nganin a pagltan a dowa nan, a Masalinggagaw; da a phakagaga kiran on mbitiyarai.
يَوْمَ يَقُومُ الرُّوحُ وَالْمَلَائِكَةُ صَفًّا ۖ لَّا يَتَكَلَّمُونَ إِلَّا مَنْ أَذِنَ لَهُ الرَّحْمَٰنُ وَقَالَ صَوَابًا
( 38 ) Sii ko alongan a tomindg so Roh ago so manga malaikat a zasaasaap, da a makaptharo kiran, a rowar sa idinan (o Allah a) Masalinggagaw, ago ptharo sa ontol.
ذَٰلِكَ الْيَوْمُ الْحَقُّ ۖ فَمَن شَاءَ اتَّخَذَ إِلَىٰ رَبِّهِ مَآبًا
( 39 ) Giyoto man so alongan a bnar; na sadn sa khabaya na mbaal sa darpa a khandodan sii ko Kadnan iyan.
إِنَّا أَنذَرْنَاكُمْ عَذَابًا قَرِيبًا يَوْمَ يَنظُرُ الْمَرْءُ مَا قَدَّمَتْ يَدَاهُ وَيَقُولُ الْكَافِرُ يَا لَيْتَنِي كُنتُ تُرَابًا
( 40 ) Mataan! a Skami na piyakiiktiyaran Ami rkano so siksa a marani, sii ko alongan a kasandngan o taw so miyanggalbk o mbala a lima niyan, na matharo o miyongkir: "Hay oba ako bo mimbaloy a botha."
