Mëranaw Guro Alim Saromantang
Surah At-Takwir ( The Overthrowing ) - Aya count 29
إِذَا الشَّمْسُ كُوِّرَتْ
( 1 ) 
Amay ka so alongan na kowaan sa sindaw,
وَإِذَا النُّجُومُ انكَدَرَتْ
( 2 ) Go amay ka so manga bitoon na manga oolog,
وَإِذَا الْجِبَالُ سُيِّرَتْ
( 3 ) Go amay ka so manga palaw na mamangi kayontong,
وَإِذَا الْعِشَارُ عُطِّلَتْ
( 4 ) Go amay ka so manga onta a mawgat na indaraynon,
وَإِذَا الْوُحُوشُ حُشِرَتْ
( 5 ) Go amay ka so manga binatang na timoon,
وَإِذَا الْبِحَارُ سُجِّرَتْ
( 6 ) Go amay ka so manga kalodan na pakakadgn,
وَإِذَا النُّفُوسُ زُوِّجَتْ
( 7 ) Go amay ka so manga niyawa na itoon ko manga ganap iyan.
وَإِذَا الْمَوْءُودَةُ سُئِلَتْ
( 8 ) Go amay ka so bagowaraga a inilbng a oyagoyag na iiza,
بِأَيِّ ذَنبٍ قُتِلَتْ
( 9 ) O antonaa i dosa a sabap a inibono on;
وَإِذَا الصُّحُفُ نُشِرَتْ
( 10 ) Go amay ka so manga daptar (a siyoratan ko manga amal) na kayatn,
وَإِذَا السَّمَاءُ كُشِطَتْ
( 11 ) Go amay ka so langit na pokasn ko darpa iyan,
وَإِذَا الْجَحِيمُ سُعِّرَتْ
( 12 ) Go amay ka so naraka Jahim na pakazokhaya on,
وَإِذَا الْجَنَّةُ أُزْلِفَتْ
( 13 ) Go amay ka so sorga na ipakarani (ko miyamananggila),
عَلِمَتْ نَفْسٌ مَّا أَحْضَرَتْ
( 14 ) Na katokawan o ginawa so pithiyagar iyan.
فَلَا أُقْسِمُ بِالْخُنَّسِ
( 15 ) Na pzapa Ako sa ibt ko (manga bitoon a) sombang somdp,
الْجَوَارِ الْكُنَّسِ
( 16 ) A pphamalalagoy a pphamangigaib,
وَاللَّيْلِ إِذَا عَسْعَسَ
( 17 ) Go so gagawii igira a phakalibotng,
وَالصُّبْحِ إِذَا تَنَفَّسَ
( 18 ) Go so khapita igira a phakaliwanag.
إِنَّهُ لَقَوْلُ رَسُولٍ كَرِيمٍ
( 19 ) Mataan! (a giya Qor´an aya) na titho a gii matharo o Sogo a sslaan,
ذِي قُوَّةٍ عِندَ ذِي الْعَرْشِ مَكِينٍ
( 20 ) Mabagr sii ko Khirk ko kapaar, a adn a pangkatan Iyan,
مُّطَاعٍ ثَمَّ أَمِينٍ
( 21 ) Pkhaonotan roo, a kasasanaan.
وَمَا صَاحِبُكُم بِمَجْنُونٍ
( 22 ) Na da ko bolayoka iyo (a Mohammad) iba pmbthanga.
وَلَقَدْ رَآهُ بِالْأُفُقِ الْمُبِينِ
( 23 ) Na sabnsabnar a miyailay niyan skaniyan (a Jibril) ko sindadan o kaylay sa poro a mapayag;
وَمَا هُوَ عَلَى الْغَيْبِ بِضَنِينٍ
( 24 ) Go kna a ba niyan inipligt so katawan iyan ko da mapayag;
وَمَا هُوَ بِقَوْلِ شَيْطَانٍ رَّجِيمٍ
( 25 ) Go kna a ba aya katharo a shaytan a pradiyamn:
فَأَيْنَ تَذْهَبُونَ
( 26 ) Na anda kano zong?
إِنْ هُوَ إِلَّا ذِكْرٌ لِّلْعَالَمِينَ
( 27 ) Daa salakaw saya a rowar sa pananadm a bagian o manga kaadn,
لِمَن شَاءَ مِنكُمْ أَن يَسْتَقِيمَ
( 28 ) Sii ko taw a kabaya iyan rkano a kapakaontol iyan:
وَمَا تَشَاءُونَ إِلَّا أَن يَشَاءَ اللَّهُ رَبُّ الْعَالَمِينَ
( 29 ) Na da a kapaar iyo, inonta sa kabaya o Allah, a Kadnan o manga kaadn.
