Mëranaw Guro Alim Saromantang
Surah Al-Hadid ( The Iron ) - Aya count 29
سَبَّحَ لِلَّهِ مَا فِي السَّمَاوَاتِ وَالْأَرْضِ ۖ وَهُوَ الْعَزِيزُ الْحَكِيمُ
( 1 ) 
Pthasbik ko Allah so zisii ko manga langit ago so lopa; go Skaniyan so Mabagr, a Mawngangn.
لَهُ مُلْكُ السَّمَاوَاتِ وَالْأَرْضِ ۖ يُحْيِي وَيُمِيتُ ۖ وَهُوَ عَلَىٰ كُلِّ شَيْءٍ قَدِيرٌ
( 2 ) Rk Iyan so kapaar ko manga langit go so lopa: Pphangoyag go Pphangimatay; go Skaniyan sii ko langowan taman na Gaos Iyan.
هُوَ الْأَوَّلُ وَالْآخِرُ وَالظَّاهِرُ وَالْبَاطِنُ ۖ وَهُوَ بِكُلِّ شَيْءٍ عَلِيمٌ
( 3 ) Skaniyan i Pagampaganay go Moripori, go Mapayag go Masoln; go Skaniyan sii ko langowan taman na katawan Iyan.
هُوَ الَّذِي خَلَقَ السَّمَاوَاتِ وَالْأَرْضَ فِي سِتَّةِ أَيَّامٍ ثُمَّ اسْتَوَىٰ عَلَى الْعَرْشِ ۚ يَعْلَمُ مَا يَلِجُ فِي الْأَرْضِ وَمَا يَخْرُجُ مِنْهَا وَمَا يَنزِلُ مِنَ السَّمَاءِ وَمَا يَعْرُجُ فِيهَا ۖ وَهُوَ مَعَكُمْ أَيْنَ مَا كُنتُمْ ۚ وَاللَّهُ بِمَا تَعْمَلُونَ بَصِيرٌ
( 4 ) Skaniyan so miyadn ko manga langit go so lopa sii ko nm alongan; oriyan iyan na lominiyawaw ko aras a samporna a kaliyawaw ko domadait on: Katawan Iyan so pphakasold ko lopa, go so pphakaliyo a phoon rkaniyan, go so pphakatoron a phoon ko langit, go so pphakapanik on; go Skaniyan na pd iyo apiya anda kano matatago. Na so Allah na so gii niyo nggolawlaan na phagilayn Iyan.
لَّهُ مُلْكُ السَّمَاوَاتِ وَالْأَرْضِ ۚ وَإِلَى اللَّهِ تُرْجَعُ الْأُمُورُ
( 5 ) Rk Iyan so kapaar ko manga langit go so lopa: Na sii bo ko Allah phakandoda so langowan taman a pkhawlawla.
يُولِجُ اللَّيْلَ فِي النَّهَارِ وَيُولِجُ النَّهَارَ فِي اللَّيْلِ ۚ وَهُوَ عَلِيمٌ بِذَاتِ الصُّدُورِ
( 6 ) Pphakasoldn Iyan so kagagawii ko dawndaw, go pphakasoldn Iyan so dawndaw ko gagawii. Na Skaniyan i Matao ko zisii ko manga rarb (a manga pamikiran).
آمِنُوا بِاللَّهِ وَرَسُولِهِ وَأَنفِقُوا مِمَّا جَعَلَكُم مُّسْتَخْلَفِينَ فِيهِ ۖ فَالَّذِينَ آمَنُوا مِنكُمْ وَأَنفَقُوا لَهُمْ أَجْرٌ كَبِيرٌ
( 7 ) Paratiyayaa niyo so Allah go so sogo Iyan, go pammgay kano ko biyaloy kano Niyan on a miyamakasambi; na so miyamaratiyaya a pd rkano go miyammgay siran, na adn a bagian iran a balas a lbi a mala.
وَمَا لَكُمْ لَا تُؤْمِنُونَ بِاللَّهِ ۙ وَالرَّسُولُ يَدْعُوكُمْ لِتُؤْمِنُوا بِرَبِّكُمْ وَقَدْ أَخَذَ مِيثَاقَكُمْ إِن كُنتُم مُّؤْمِنِينَ
( 8 ) Na antonaa i bangn iyo sa di niyo kapharatiyayaa ko Allah? A so Rasol na pthawagn kano niyan, ka an iyo maparatiyaya so Kadnan iyo, a sabnar a miyatarima Iyan so diyandi iyo, o skano na khipaparatiyaya.
هُوَ الَّذِي يُنَزِّلُ عَلَىٰ عَبْدِهِ آيَاتٍ بَيِّنَاتٍ لِّيُخْرِجَكُم مِّنَ الظُّلُمَاتِ إِلَى النُّورِ ۚ وَإِنَّ اللَّهَ بِكُمْ لَرَءُوفٌ رَّحِيمٌ
( 9 ) Skaniyan so initoron Iyan ko oripn Iyan so manga ayat a manga rarayag, ka ang kano Niyan mapakaawa phoon ko manga lilibotng a makasong kano ko maliwanag. Na mataan! a so Allah na mala rkano i gagaw, a Makalimoon.
وَمَا لَكُمْ أَلَّا تُنفِقُوا فِي سَبِيلِ اللَّهِ وَلِلَّهِ مِيرَاثُ السَّمَاوَاتِ وَالْأَرْضِ ۚ لَا يَسْتَوِي مِنكُم مَّنْ أَنفَقَ مِن قَبْلِ الْفَتْحِ وَقَاتَلَ ۚ أُولَٰئِكَ أَعْظَمُ دَرَجَةً مِّنَ الَّذِينَ أَنفَقُوا مِن بَعْدُ وَقَاتَلُوا ۚ وَكُلًّا وَعَدَ اللَّهُ الْحُسْنَىٰ ۚ وَاللَّهُ بِمَا تَعْمَلُونَ خَبِيرٌ
( 10 ) Na antonaa i bangn iyo sa di niyo kaphammgay sa lalan ko Allah? - a rk o Allah so paninggalan ko manga langit ago so lopa. Da a phakatimbang rkano ko taw a miyammgay, ko dapn so kapakadaag, go miyakimbonoay. Siran man i mala i daradat a di so siran a miyammgay ko oriyan iyan; go miyakimbonoay siran. Na oman i isa kiran na inidiyandi on o Allah so mapiya. Na so Allah na so gii niyo nggolawlaan na Kaip Iyan.
مَّن ذَا الَّذِي يُقْرِضُ اللَّهَ قَرْضًا حَسَنًا فَيُضَاعِفَهُ لَهُ وَلَهُ أَجْرٌ كَرِيمٌ
( 11 ) Antawa aya i phagotang ko Allah sa otang a mapiya? ka an Iyan on mathaktakp, go adn a bagian iyan a balas a mapiya.
يَوْمَ تَرَى الْمُؤْمِنِينَ وَالْمُؤْمِنَاتِ يَسْعَىٰ نُورُهُم بَيْنَ أَيْدِيهِمْ وَبِأَيْمَانِهِم بُشْرَاكُمُ الْيَوْمَ جَنَّاتٌ تَجْرِي مِن تَحْتِهَا الْأَنْهَارُ خَالِدِينَ فِيهَا ۚ ذَٰلِكَ هُوَ الْفَوْزُ الْعَظِيمُ
( 12 ) Sii ko alongan a maylaing ka so miyamaratiyaya a manga mama, go so miyamaratiyaya a manga babay, - a somisindaw so tihaya iran ko hadapan iran go sii ko kawanan iran (ptharoon kiran:) "Tothol rkano a mapiya sa alongan nai: So manga sorga a pphamangondas ko kababaan iyan so manga lawasayg, kakal kano ron! Giyoto man na skaniyan so daag a lbi a mala!"
يَوْمَ يَقُولُ الْمُنَافِقُونَ وَالْمُنَافِقَاتُ لِلَّذِينَ آمَنُوا انظُرُونَا نَقْتَبِسْ مِن نُّورِكُمْ قِيلَ ارْجِعُوا وَرَاءَكُمْ فَالْتَمِسُوا نُورًا فَضُرِبَ بَيْنَهُم بِسُورٍ لَّهُ بَابٌ بَاطِنُهُ فِيهِ الرَّحْمَةُ وَظَاهِرُهُ مِن قِبَلِهِ الْعَذَابُ
( 13 ) Alongan a tharoon o manga monapik a manga mama, go so manga monapik a manga babay ko siran a miyamaratiyaya: "Nayawa kami niyo, ka ang kami makakowa sa maliwanag ko tihaya niyo!" adn a tharo: "Kasoy kano ko talikhodan iyo, na ploloba kano sa tihaya!" Na katagoan so lt iran sa kota a adn a pinto iyan, so sold iyan na madadalm on so limo, na so liyo niyan na mapapantag skaniyan o siksa!
يُنَادُونَهُمْ أَلَمْ نَكُن مَّعَكُمْ ۖ قَالُوا بَلَىٰ وَلَٰكِنَّكُمْ فَتَنتُمْ أَنفُسَكُمْ وَتَرَبَّصْتُمْ وَارْتَبْتُمْ وَغَرَّتْكُمُ الْأَمَانِيُّ حَتَّىٰ جَاءَ أَمْرُ اللَّهِ وَغَرَّكُم بِاللَّهِ الْغَرُورُ
( 14 ) Tawagn iran siran: "Ba kami niyo di manga pd?" Ismbag iran: "Oway; na ogaid na bininasa niyo so manga ginawa niyo, go mithidaraan kano, go mizangka kano, go miyalimpang kano o manga ongaya taman sa miyakaoma so sogoan o Allah; go miyalimpang kano makapantag ko Allah o palilimpang (a shaytan)."
فَالْيَوْمَ لَا يُؤْخَذُ مِنكُمْ فِدْيَةٌ وَلَا مِنَ الَّذِينَ كَفَرُوا ۚ مَأْوَاكُمُ النَّارُ ۖ هِيَ مَوْلَاكُمْ ۖ وَبِئْسَ الْمَصِيرُ
( 15 ) "Na sa alongan nai na da a khatarima a phoon rkano a saliyo o ginawa, odi na phoon ko siran a miyamangongkir. Aya darpa iyo na so naraka: Giyoto i patot rkano. Na miyakaratarata a khabolosan!"
أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ وَلَا يَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الْأَمَدُ فَقَسَتْ قُلُوبُهُمْ ۖ وَكَثِيرٌ مِّنْهُمْ فَاسِقُونَ
( 16 ) Ba da makawma so masa ko siran a miyamaratiyaya a kapakambayorantang o manga poso iran ko tadm ko Allah go so miyakatoron a bnar, ka an siran di khabaloy a lagid o siran a piyamgan ko kitab gowani, na miyakalayat kiran so masa na tomigas so manga poso iran, go madakl kiran a manga songklid.
اعْلَمُوا أَنَّ اللَّهَ يُحْيِي الْأَرْضَ بَعْدَ مَوْتِهَا ۚ قَدْ بَيَّنَّا لَكُمُ الْآيَاتِ لَعَلَّكُمْ تَعْقِلُونَ
( 17 ) Tangkda niyo a mataan! a so Allah i phagoyag ko lopa ko oriyan o kapatay niyan. Sabnar a piyakarayag Ami rkano so manga tanda, ka an iyo sabota.
إِنَّ الْمُصَّدِّقِينَ وَالْمُصَّدِّقَاتِ وَأَقْرَضُوا اللَّهَ قَرْضًا حَسَنًا يُضَاعَفُ لَهُمْ وَلَهُمْ أَجْرٌ كَرِيمٌ
( 18 ) Mataan! a so manga barasadka, a manga mama, go so manga barasadka, a manga babay, go piyagotangan iran so Allah sa otang a mapiya, na pthaktakpn kiran, go adn a bagian iran a balas a mapiya.
وَالَّذِينَ آمَنُوا بِاللَّهِ وَرُسُلِهِ أُولَٰئِكَ هُمُ الصِّدِّيقُونَ ۖ وَالشُّهَدَاءُ عِندَ رَبِّهِمْ لَهُمْ أَجْرُهُمْ وَنُورُهُمْ ۖ وَالَّذِينَ كَفَرُوا وَكَذَّبُوا بِآيَاتِنَا أُولَٰئِكَ أَصْحَابُ الْجَحِيمِ
( 19 ) Na so miyamaratiyaya ko Allah go so manga sogo Iyan, na siran man na siran so mithotomangkd; go manga saksi sii ko Kadnan iran, na adn a bagian iran a balas kiran go sindaw iran. Na so miyamangongkir go piyakambokhag iran so manga ayat Ami, na siran man i manga taw ko naraka Jahim.
اعْلَمُوا أَنَّمَا الْحَيَاةُ الدُّنْيَا لَعِبٌ وَلَهْوٌ وَزِينَةٌ وَتَفَاخُرٌ بَيْنَكُمْ وَتَكَاثُرٌ فِي الْأَمْوَالِ وَالْأَوْلَادِ ۖ كَمَثَلِ غَيْثٍ أَعْجَبَ الْكُفَّارَ نَبَاتُهُ ثُمَّ يَهِيجُ فَتَرَاهُ مُصْفَرًّا ثُمَّ يَكُونُ حُطَامًا ۖ وَفِي الْآخِرَةِ عَذَابٌ شَدِيدٌ وَمَغْفِرَةٌ مِّنَ اللَّهِ وَرِضْوَانٌ ۚ وَمَا الْحَيَاةُ الدُّنْيَا إِلَّا مَتَاعُ الْغُرُورِ
( 20 ) Tangkda niyo a so kawyagoyag ko doniya na matag katmbangan, go karimbaran, go kapangangarig, go kambantogan ko ltlt iyo, go kapamagindiga sa kadakl i manga tamok go manga wata. Lagid o oran, a miyasoat so taribasok o piyakato iyan, oriyan iyan na mrorang na maylaing ka skaniyan a makabinaning, oriyan iyan na mabaloy a rarag. Na zisii ko akhirat so siksa a sangat, go so maap a phoon ko Allah go kasosoat. Na da ko kawyagoyag ko doniya inonta na matag sagad a kapipiya a ginawa, a phakalimpang.
سَابِقُوا إِلَىٰ مَغْفِرَةٍ مِّن رَّبِّكُمْ وَجَنَّةٍ عَرْضُهَا كَعَرْضِ السَّمَاءِ وَالْأَرْضِ أُعِدَّتْ لِلَّذِينَ آمَنُوا بِاللَّهِ وَرُسُلِهِ ۚ ذَٰلِكَ فَضْلُ اللَّهِ يُؤْتِيهِ مَن يَشَاءُ ۚ وَاللَّهُ ذُو الْفَضْلِ الْعَظِيمِ
( 21 ) Pagoradorad kano ko maap a phoon ko Kadnan iyo, go so sorga a aya kablang iyan na lagid o kablang o langit go so lopa, a inithiyagar ko siran a miyamaratiyaya ko Allah go so manga sogo Iyan: Giyoto man so kakawasaan o Allah, a imbgay Niyan oto ko taw a kabaya Iyan: Na so Allah i Khirk ko kakawasaan a lbi a mala.
مَا أَصَابَ مِن مُّصِيبَةٍ فِي الْأَرْضِ وَلَا فِي أَنفُسِكُمْ إِلَّا فِي كِتَابٍ مِّن قَبْلِ أَن نَّبْرَأَهَا ۚ إِنَّ ذَٰلِكَ عَلَى اللَّهِ يَسِيرٌ
( 22 ) Daa khisogat a tiyoba ko lopa, odi na sii ko manga ginawa niyo a ba di matatago ko daptar ko da Ami ron pn kaadna: - mataan! a giyoto sii ko Allah na malbod,
لِّكَيْلَا تَأْسَوْا عَلَىٰ مَا فَاتَكُمْ وَلَا تَفْرَحُوا بِمَا آتَاكُمْ ۗ وَاللَّهُ لَا يُحِبُّ كُلَّ مُخْتَالٍ فَخُورٍ
( 23 ) Ka an iyo di mipmboko so miyada rkano, go an iyo di mipzonor so inibgay Niyan rkano. Na so Allah na di Niyan khabayaan so oman i takabor, a tangandag, -
الَّذِينَ يَبْخَلُونَ وَيَأْمُرُونَ النَّاسَ بِالْبُخْلِ ۗ وَمَن يَتَوَلَّ فَإِنَّ اللَّهَ هُوَ الْغَنِيُّ الْحَمِيدُ
( 24 ) A siran na manga liligt, go ipzogo iran ko manga manosiya so kapligt. Na sa taw a tomalikhod, na mataan! a so Allah na Skaniyan so Kawasa a Pphodin.
لَقَدْ أَرْسَلْنَا رُسُلَنَا بِالْبَيِّنَاتِ وَأَنزَلْنَا مَعَهُمُ الْكِتَابَ وَالْمِيزَانَ لِيَقُومَ النَّاسُ بِالْقِسْطِ ۖ وَأَنزَلْنَا الْحَدِيدَ فِيهِ بَأْسٌ شَدِيدٌ وَمَنَافِعُ لِلنَّاسِ وَلِيَعْلَمَ اللَّهُ مَن يَنصُرُهُ وَرُسُلَهُ بِالْغَيْبِ ۚ إِنَّ اللَّهَ قَوِيٌّ عَزِيزٌ
( 25 ) Sabnsabnar a siyogo Ami so manga sogo Ami a rakhs o manga rarayag a karina, go piyakatoron Ami a babid iran so kitab, go so timbangan, ka an mapakatindg o manga manosiya so kaontol; go inadn Ami so potaw a kadadalman sa bagr, a mala, go manga gona a rk o manga manosiya, go an mapnto o Allah so taw a thabang Rkaniyan go so manga sogo Iyan sii ko kisosoln iyan. Mataan! a so Allah na Mabagr, a Domadaag.
وَلَقَدْ أَرْسَلْنَا نُوحًا وَإِبْرَاهِيمَ وَجَعَلْنَا فِي ذُرِّيَّتِهِمَا النُّبُوَّةَ وَالْكِتَابَ ۖ فَمِنْهُم مُّهْتَدٍ ۖ وَكَثِيرٌ مِّنْهُمْ فَاسِقُونَ
( 26 ) Na sabnsabnar a siyogo Ami so Noh go so Ibrahim, go inisnggay Ami sii ko manga moriyataw iran so kananabii go so kitab. Na adn a pd kiran a komkdg ko ontol; go madakl kiran a manga songklid.
ثُمَّ قَفَّيْنَا عَلَىٰ آثَارِهِم بِرُسُلِنَا وَقَفَّيْنَا بِعِيسَى ابْنِ مَرْيَمَ وَآتَيْنَاهُ الْإِنجِيلَ وَجَعَلْنَا فِي قُلُوبِ الَّذِينَ اتَّبَعُوهُ رَأْفَةً وَرَحْمَةً وَرَهْبَانِيَّةً ابْتَدَعُوهَا مَا كَتَبْنَاهَا عَلَيْهِمْ إِلَّا ابْتِغَاءَ رِضْوَانِ اللَّهِ فَمَا رَعَوْهَا حَقَّ رِعَايَتِهَا ۖ فَآتَيْنَا الَّذِينَ آمَنُوا مِنْهُمْ أَجْرَهُمْ ۖ وَكَثِيرٌ مِّنْهُمْ فَاسِقُونَ
( 27 ) Oriyan iyan na piyakitondog Ami so manga lakaw iran ko manga sogo Ami; go piya kitondog Ami ko Eysa a wata o Maryam, go inibgay Ami rkaniyan so Injil, go tiyagoan Ami so manga poso o siran a miyamangonot rkaniyan sa ranon, go limo, go kasibay a pimbago iran oto, a da Ami kiran paliyogatn, ogaid na singanin ko kasosoat o Allah; na da iran oto paliharaa ko titho a kapaliharaa on. Na inibgay Ami ko siran a miyamaratiyaya a pd kiran so balas kiran; na madakl kiran a manga songklid.
يَا أَيُّهَا الَّذِينَ آمَنُوا اتَّقُوا اللَّهَ وَآمِنُوا بِرَسُولِهِ يُؤْتِكُمْ كِفْلَيْنِ مِن رَّحْمَتِهِ وَيَجْعَل لَّكُمْ نُورًا تَمْشُونَ بِهِ وَيَغْفِرْ لَكُمْ ۚ وَاللَّهُ غَفُورٌ رَّحِيمٌ
( 28 ) Hay so miyamaratiyaya, kalkn iyo so Allah, go paratiyayaa niyo so sogo Iyan; ka bgang kano Niyan sa takp ko limo Iyan, go snggayan kano Niyan sa sindaw a milalakaw niyo skaniyan go napiyan kano Niyan: Na so Allah na Manapi, a Makalimoon:
لِّئَلَّا يَعْلَمَ أَهْلُ الْكِتَابِ أَلَّا يَقْدِرُونَ عَلَىٰ شَيْءٍ مِّن فَضْلِ اللَّهِ ۙ وَأَنَّ الْفَضْلَ بِيَدِ اللَّهِ يُؤْتِيهِ مَن يَشَاءُ ۚ وَاللَّهُ ذُو الْفَضْلِ الْعَظِيمِ
( 29 ) Kaan katokawi o tiyoronan ko kitab a da a kapaar iran a mayto bo ko kakawasaan o Allah, ka mataan! a so kakawasaan na sii sa tangan o Allah, imbgay Niyan oto ko taw a kabaya Iyan. Na so Allah i Khirk ko kakawasaan a lbi a mala.
